KORONADAL CITY – Indi buho para sa deep well kundi kasubong sang “treasure hunting” ang natukiban sa lote ni Barangay Kagawad Joseph Tolentino sa Sitio Cogonal, Barangay Topland, Koronadal City.
Ini ang ginpahayag ni City Environment and Natural Resources Officer (CENRO) Augustus Bretaña sa interview sang Bombo Radyo Koronadal.
Suno kay Bretaña ang naabtan sang inspection team sa lugar ang buho kag kagamitan nga ginagamit sa pagpangita sang bulawan kasubong sa mga nahauna nga na-raid naman nila kag napauntat.
Dugang pa sini nga kung deep well gid man ang rason ni Kagawad Tolentino iya ina nga rason apang magapaguwa man sila sang findings kag analysis sandig sa nakit-an sa lugar nga ginakutkot.
Sa pagkamatuod, nagpadala na ang CENRO sang summon ukon sulat kay Kagawad Tolentino kag sa pila pa ka opisyal nga ginpangalanan nga nagapanguna sa operasyon ukon aktibidad sa nasambit nga lugrr.
Magluwas sa mga concerned nga barangay official, mangin kalakip man sa igapatawag ang barangay council sang Barangay Topland kag subong man sang Bo. 4 agud maistoryahan ang natabo kag maathagan ang tanan.
Liwat man nga gin-eksplikar ni Bretaña nga apisar pa nga ang nagapanag-iya sang duta ang nagapatigayon sang operasyon may salabton gihapon ini.
Sa pagpatigayon sang operasyon kasubong sang treasure hunting ukon pagkutkot sang anuman nga minerales sa idalom sang duta kinahanglan ang pagpahibalo sa concerned agencies, pagkuha sang nagakaigo nga permit, clearances, pagpahibalo sa barangay kag public consultation sang mga residente sa palibot nga mahimo maapektuhan.
Kag ini tanan ang wala nahimo antes pa man ang pagkutkot sa nasambit nga lugar.
Maayo na lamang kay may nagreklamo nga mga concerned citizens kag ginpalab-ot sa Bombo rason nga nag-aksiyon man ang ila talatapan kag nagpatigayon sang inspection.
Kadungans ini, ginpasiguro man sang City ENRO nga magahimo sang tikang agud mapauntat ini para sa kaayuhan sang katawhan bangud sa tion nga mabutangan sang tubig ang madalo nga buho nga sa pagbulubanta yara na sa masobra 30 feet mangin delikado ini kag peligroso ini sa mga residente sa palibot.
