Isa ka madinuagon kag lain nga klase nga tan-awon ang nasaksihan sa Chelsea, Michigan, U.S.A. matapos maghiwat sang bayanihan ang kapin 300 ka residente agud buligan nga malipat ang sulod sang isa ka bookstore paagi sa human chain nga pag-abot sang libu-libo ka mga libro.
Ang Serendipity Books, isa ka independent nga bookstore nga ginapanag-iyahan ni Michelle Tuplin, nagbalhin sang iya tindahan sa bag-o nga lokasyon nga mga 350 ka talampakan lang ang kalayuon halin sa daan sini nga puwesto.
Imbes nga magamit sang moving service, nangayo sang bulig si Tuplin sa mga boluntaryo kag wala siya ginpalya.
Nag-upod sa aktibidad ang masobra 300 ka tawo kag isa ka ido. Isa-isa nga ginpasa ang 9,100 ka mga libro halin sa kamot sang isa ka volunteer pakadtu sa sunod, hasta nga makaabot ini sa bag-o nga puwesto sang bookstore.
Wala pa gani nag-abot sang duha ka oras ang bug-os nga proseso sang pagbalhin sang mga libro patimaan nga ang pagbinuligay kag pagkahiusa may gahum nga magpahapos sang mabug-at nga obra.
Suno pa kay Tuplin, makita ang lapad nga partisipasyon halin sa nagkalain-lain nga henerasyon. Isa sa mga volunteer amo ang 91-anyos nga lola nga suki na sang bookstore, may mga ginikanan man nga nag-upod pa ang ila anum ka tuig nga bata.
Sa panahon nga madamo na ang naga-online shopping kag nagasalig sa teknolohiya, isa ini ka pahinumdom nga ang mga lokal nga tindahan indi lang basta negosyo kundi kabahin sang komunidad.
