KORONADAL CITY – Bangkay na nga nasapwan sa sulod sang ila puluyan pasado alas 7:20 kaina sang aga ang duha ka menor de edad kag amay sang mga ini sa banwa sang Tantangan, South Cotabato.
Ginkilala ang mga biktima nga sanday Biboy , 6 anyos kag Jhelo, 4 anyos kag ang ila amay nga si Willy Enalbes nga mga residente sang Purok 3, Barangay Dumadalig, Tantangan, South Cotabato.
Sa interbyu sang Bombo Radyo Koronadal kay PSI Reden Cristologo, hepe sang Tantangan PNP, naguwa sa ila imbestigasyon nga ang amay mismo ang nagpatay sa kaugalingon sini nga mga bata paagi sa pagbuno sang kutsilyo sa ila nga mga dughan antes nga naghikog.
Bangud sa tuman nga selos kag depression suno pa ang ginalantaw nga rason kun ngaa nahimo sang suspek ang krimen.
Ini bangud yara sa Metro Manila ang asawa ni Willy kag naga-apply padulong sa aborad.
Suno kay PSI Cristologo, yara sa poder sang ila lola nga si Marciana ang duha ka mga bata apang ginkuha ini sang ila amay kagab-i nga hubog kag wala nagdahum nga pamatyon niya ini kag utason man ang kaugalingon nga kabuhi.
Sa subong yara na sa lugar ang SOCO kag nagapatigayon sang imbestigasyon.
Narekober naman sa crime scene ang kutsilyo nga gingamit sang suspek sa pagpatay sa mga bata sini, ang gingamit niya sa paghikog kag ang cellphone nga may kaundan pa sang mga text messages nila sang iya asawa nga nagainaway.
Posible suno pa nga kagab-i pa ginpatay sang suspek ang mga bata sini antes nga naghikog.
