KORONADAL CITY– Nagpatigayon na sa karun sang madalom nga imbestigasyon ang pamunuan sang South Cotabato Integrated Provincial Health Office kaangot sa nagluntad nga mainit nga away sa tunga sang doktor kag isa ka watcher sang pasyente sa South Cotabato Provincial Hospital.
Base sa blotter report sang Koronadal City PNP, una nga ginreport sang isa ka Ginang nga si Nilda Gaan Liboon, 51 anyos nga residente sang Brgy. Concepcion syudad sang Koronadal ang isa ka doktor suno pa sang South Cotabato Provincial Hospital nga si Dr. Joemel Dacula nga nagpanakit suno pa sa iya kag ginbuno suno pa ini sang signing pen kun sa diin nag-angkon ini sang mga pilas sa ulo kag pila ka bahin sang iya nga kalawasan.
Samtang sa ginpablotter naman ni Dr. Joemel Dacula, 35 anyos, residente sang Brgy. Morales syudad sang Koronadal kag isa ka doktor sa South Cotabato Provincial Hospital, gintampa, ginliab kag gin buyayaw suno pa ini ni Liboon bangud sa ila baisanay angot sa resulta sang laboratory test sang apo sini.
Sa karun wala pa sang ginpagwa nga official statement ang pamunuan sang ospital angot sa nasambit nga panghitabo kag ginatilawan na sang Bombo Radyo Koronadal nga kuhaon ang eksplinasyon sang doktor kag watcher sang pasyente.
