KORONADAL CITY-Nagtuga na sang kahadlok ang asud-asod nga shooting incident sa syudad sang Koronadal kun sa diin magkasubong nga mga riding in tandem ang suspek.
Nahibaluan nga alas 10:20 kagab-i isa naman ang nangin biktima nga ginkilala kay Jonathan Belisario Pulido, 35- anyos, welder kag residente sang Brgy. GPS, Koronadal City.
Sa report sang Koronadal City PNP, samtang ginamaneho sang biktima ang motor sini, gulpi na lamang siya nga gintiro sang riding in tandem sa bahin sang Corner Morrow, Arellano St. nga nag-igo sa nawala nga guya sini kag naglusot pa sa iya ulo nga rason sang iya gilayon nga kamatayon.
Base naman suno pa sa mga nakasaksi, nakasoksok sang helmet ang mga suspek kag gilayon ginpaharurot ang motor matapos ang ginhimo nga krimen. Narekober sa ginluntaran sang krimen ang isa ka basyo sang bala halin sa cal. 45 nga subong ginpaidalum na sa cross matching.
Nagtuga naman ini sang kahadlok sa Koronadal ilabi na subong nga bulan lamang sang Disyembre lima na ang napagkit nga kaso sang shooting incident kun sa diin ang suspek ang magkasubong nga riding in tandem.
