Ginapaklaro sang Armed Forces of the Philippines nga wala sang ila pagpahanugot kag wala nagarepresentar sang opisyal nga posisyon sang militar ang nagalapta nga mga post sa social media nga nagausar sang laragway ni AFP Chief of Staff Gen. Romeo Brawner Jr. agud mang-agda sa mga political activities kag madamo nga protesta.
Ginpabug-atan ni Col. Xerxes Trinidad, hepe sang Public Affairs Office sang AFP, nga ang AFP isa ka propesyonal, nahiliusa, kag wala sang ginapaboran nga institusyon nga wala nagasuporta ukon nagapartisipar sa bisan ano nga partisan political activities.
Suno kay Trinidad, ang tanan nga aksyon sang AFP nakabase lang sa Konstitusyon, sa mga layi sang pungsod, kag sa ila ginpanumpaan nga katungdanan sa pagserbisyo sa pungsod.
Nagpanawagan man ang militar sa publiko nga mangin vigilante kag siguruhon anay ang kamatuoran sang impormasyon antes magbahin ukon magpalapta sang mga online content nga sala nga nagaulamid sa AFP.
Ginpasiguro naman sang AFP nga padayon sila nga nagapabilin nga mabakod, disiplinado, kag nakapokus sa ila mandato nga proteheran ang katawhan kag mapabilin ang seguridad kag integridad sang teritoryo sang Pilipinas.
