KORONADAL CITY – Patong-patong nga kaso ang ginakaatubang sang isa ka driver makaligad nga naglikaw ini sa isa ka checkpoint sa banwa sang Midsayap, North Cotabato.
Ginkilala ang suspek nga si Naser Ampatuan Moson, nga tag-iya sang ginasakyan nga kulay brown nga Toyota pick-up truck.
Sa impormasyon nga nakuha sang Bombo Radyo Koronadal, sa baylo nga magpundo si Moson sa checkpoint sa Poblacion 8 sa nasambit nga banwa, ginpadasigan pa sini ang iya dalagan rason nga ginlagas siya sang gintingob nga pwersa sang 34th Infantry Battalion kag Midsayap PNP.
Nadakpan sang mga otoridad ang driver sa bahin sang Poblacion 5 kag nakuha halin sa iya ang isa ka loaded nga M4 carbine kag M26 fragmentation grenade.
Gilayon nga gin-arestar si Moson kag ginkasuhan sang disobedience to an agent of person in authority, illegal possession of firearms and ammunition ukon RA 10591 kag illegal possession of explosives ukon RA 9516.
Nagpahanumdom naman si 6th Infantry Divison Commander Brigadier Genera Cirilito Sobejana nga magtuman sa layi ilabi na nga yara pa sa idalom ang Mindanao sa martial law.
