KORONADAL CITY – Nagpahayag na ang abyan ni Jeanelyn Villavende sa iya mga naeksperyensiyahan didto sa Kuwait.
Sa iya ginpaguwa nga video message, ginaantos niya ang mga obra sa balay kun sa diin overworked suno pa ini bangud nagalab-ot sa lima ka panalgan ang puloy-an sang amo nga iya ginaserbehan.
Gin-ako sini nga sarang niya nga maantos ang ini kadako nga responsibilidad apang ginbuyagyag sini nga kun kis-a nakaeksperyensyar man ini sang sekswal nga pagpang-abuso.
Suno sa iya, ginatawag siya kun kis-a sang sa isa sa pito ka mga bata sang iya amo kag ginapauyat kag ginapahampang suno pa ang kinatawo sini sa iya.
Ginpaandaman niya ang nasambit nga bata nga igasugid niya ang iya ginahimo sa iya amo nga babaye, apang nag-angal ini kag ginpahayag nga indi siya pag-isugid bangud may balatian ang iya iloy.
Samtang ginpakigbahin man sini nga nagkilalahay sila ni Jeanelyn sa Maynila sa isa ka clinic para sa medical requirement.
Ginlaragway man sini nga tuman kasakit ang nadangtan ni Jeanelyn sa iya amo kasubong man sa natabo sa iya sadto.
GInbuyagyag ni Jeanelyn sa iya nga nahadlok siya sa iya amo nga lalaki nga isa ka pulis bangud masami ini nga nakalantaw sa iya.
Madumdoman nga una na nga napabalita nga missing si Magtulis apang base sa latest update, yara na suno pa ini sa accommodation sang iya agency.
