Ginadumdom subong nga adlaw, Lunes, Nobyembre 22, ang ika-17 nga anibersaryo sang 2009 Maguindanao Massacre nga nagkuha sang kabuhi sang 58 ka persona, lakip ang 32 ka miyembro sang media, sa isa sa pinakamadugo-on nga pag-atake batok sa mga mamamahayag sa maragtas sang Pilipinas. Sa pihak sang pagligad ang 17 ka tuig, padayon nga ginapanawagan sang mga pamilya sang mga biktima ang bug-os nga hustisya para sa ila mga pinalangga.
Sa interview sang Bombo Radyo Koronadal, ginpahayag ni Jan Chiene Maravilla, bata ni late Bombo Bart Maravilla, Chief of Reporters sang Bombo Radyo Koronadal, nga wala gihapon sila nagauntat sa pagpangita sang hustisya, indi lamang para sa iya amay kundi para man sa tanan nga pamilya sang mga biktima.
Bangud sa naguba nga dalan pakadto sa massacre site, ginapili na lamang nila nga magtililipon sa General Santos City agud maghiwat sang misa kag forum kaupod ang iban nga pamilya kag abogado, para madumduman ang mga biktima kag mapakigbahin ang mga bag-o nga impormasyon nahanongod sa kaso.
Sa iya panawagan kay Presidente Ferdinand “Bongbong” Marcos Jr., ginpangabay ni Maravilla nga ipakita nga ang hustisya sa Pilipinas indi lamang para sa mga manggaranon kundi para man sa mga imol.
Nagalaum ang mga pamilya nga hatagan sang prayoridad sang administrasyon ang ila panawagan kag magpatuman sang konkreto nga mga tikang agud makab-ot ang hustisya nga 17 ka tuig na nila nga ginahulat.







