Nagdugang ang tensyon sa Middle East matapos gin-angkon sang Iran nga gintarget sini ang mga US air defence radar sa Al-Rafa kag Awali air bases sa Bahrain.
Ginpahayag naman sang mga awtoridad sa Bahrain nga may industriyal nga pasilidad nga naigo kag nasunog sa insidente, apang wala sing na-report nga napilasan.
Samtang, duha ka oil tanker ang gin-igo sang wala pa makilala nga mga projectile malapit sa Oman, kag isa pa ka tanker ang nasunog matapos maigo sang naval mine sa Strait of Hormuz.
Samtang, gin-angkon man sang Islamic Revolutionary Guard Corps (IRGC) nga napatibusok nila ang duha ka US military drones, lakip ang MQ-9 kag MQ-1 Predator.
Sa pihak sini, ginpahayag ni Iranian Foreign Minister Abbas Araghchi nga mahimo nila buksan liwat ang Strait of Hormuz kun matuman ang ila mga kondisyon.
Apang, ginpamatud-an niya nga indi nila pag-uyunan ang pagbalhin sa iban nga pungsod sang ila uranium stockpile nga may 60 porsyento nga enrichment.
Sa karon, nagapabilin nga ginabantayan sang international community ang sitwasyon bangud sa posible nga epekto sini sa seguridad kag suplay sang krudo sa bug-os nga kalibutan.













