-- ADVERTISEMENT --

Naglab-ot sa P97.5 bilyon ang balor sang mga proyekto sang Department of Public Works and Highways (DPWH) nga ginkakas sang Senado sa ginapropuesto nga 2027 national budget bangud wala ini nagsunod sa mga ginapatuman nga panuntunan.

Suno kay Senador JV Ejercito, resulta ini sang pila ka semana nga pag-usisa sa mga ginapanukala nga proyekto sang ahensya.

Ginpaathag ni Ejercito nga kalabanan sang pondo nga ginkakas ang ginbalhin sa mga flagship project nga may foreign assistance, matapos masiguro ang kinahanglan nga counterpart funding. Ang nabilin naman ang ginlaan sa mga lokal nga proyekto sa imprastraktura agud mabuligan ang pag-uswag sang ekonomiya sa mga probinsya.

Dugang pa sang senador, ang hugot nga pagsusi sa paggasto sang gobyerno kasunod sang kontrobersya sa flood control projects nakaapekto sa pag-uswag sang konstruksyon, negosyo kag pangabuhian sang mga ordinaryo nga Pilipino.

Bangud sini, ginpabutyag niya ang kinahanglanon nga mapabilin ang transparency kag accountability sa paggamit sang pondo sang bayan, apang dapat man padalion ang pagpatuman sang mga aprobado nga proyekto.

Ginalayon man ni Ejercito ang pagpasanyog sang economic growth sang pungsod halin sa duha ka porsyento pakadto sa lima tubtob anum ka porsyento sa 2027, agud mapabaskog liwat ang ekonomiya kag mahagan-hagan ang kapigaduhon.