Ginkilala sang Provincial Government of South Cotabato nga isa sa mga hangkat nga ginaatubang sang mga pumuluyo sa subong amo ang paghuot sang trapiko bangud sa nagapadayon nga konstruksyon sang Link-Bridge sa South Cotabato Provincial Hospital (SCPH).
Sa interview sang Bombo Radyo Koronadal, ginpahayag ni Krez James Cabaylo, Government Information Officer sang Provincial Government of South Cotabato, nga naghatag na ang panguluhan sang probinsya sang mga alternatibo nga ruta para sa mga motorista agud mapahapsay ang pagbyahe kag malikawan ang paghuot sang trapiko.
Suno kay Cabaylo, may mga butang nga kinahanglan sakripisyuhon agud makab-ot ang mas maayo nga resulta, pareho sang ginapatigayon nga konstruksyon sang Link-Bridge nga may katuyuan nga mangin mas luwas, mahapos kag hapsay ang pagdala sa mga pasyente halin sa hospital pakadto sa Outpatient Department (OPD) Building.
Ginpahayag niya nga antes patindugon ang Link-Bridge, kinahanglan pa nga tabukon sang mga pasyente, lakip na ang mga yara sa wheelchair, ang dalan agud makaabot sa OPD Building, nga nagapadugang sa risgo kag kabudlayan sa ila pagbalhin.
Paagi sa Link-Bridge, indi na kinahanglan nga magtabok sa dalan ang mga pasyente kag indi na sila maeksponer sa peligro sang mga salakyan sa pagpadulong sa OPD Building.
Gani, nagapanawagan ang panguluhan sang probinsya sang paghangop kag pag-ilob sang publiko sa temporaryo nga kabudlayan sa trapiko bangud sa proyekto nga ginapaabot nga magahatag sang mas luwas kag mahapos nga pag-alagad sa mga pasyente.











