-- ADVERTISEMENT --

Nagapanawagan ang City Traffic Management Division (CTMD) sang Koronadal sa tanan nga mga nagamaneho sang salakyan nga mangin mas atentibo kag magpatuman sang defensive driving agud malikawan ang mga aksidente sa kadalan-on.

Sa interview sang Bombo Radyo Koronadal, ginpahayag ni Arnel B. Falcis, Deputy Chief for Administration sang CTMD, nga kinahanglan nga isilsil sa hunahuna sang tagsa ka driver nga dapat pirmi magpatuman sang defensive driving samtang nagabiyahe sa dalan.

Suno sa iya, importante man nga mangin maalam kag mapinadayunon sa paghimo sang desisyon, ilabi na sa pagliko kag iban pa nga maniobra agud malikawan ang mga pagbungguanay sang salakyan.

Nagpangabay man si Falcis sa publiko nga mangin responsable kag mahinalongon sa pagmaneho sang ila mga salakyan agud masiguro ang kaluwasan sang tanan nga nagagamit sang dalan.

Gindugang niya nga bisan madula sa panumduman sang iban ang mga aksidente nga natabo na, indi madula ang trauma nga nabilin sa mga nakaluwas sa aksidente kag ang kasakit nga ginabatyag sang pamilya sang mga nadula ang kabuhi bangud sini.