-- ADVERTISEMENT --

Ginkabig nga indi pa igo sang isa ka lokal nga hog raiser sa Polomolok ang bag-o nga gintalana nga floor price nga ₱160 kada kilo sang buhi nga baboy agud makabawi sa mga nalugian ang mga manug-alaga sini.

Sa interview sang Bombo Radyo Koronadal, ginpahayag ni Amy Jean Jugador nga bisan ginakalipay sang mga hog raisers ang pagpagwa sang Executive Order nga nagtakda sang bag-o nga presyo, may pila gihapon sa ila nga nagaduhaduha kon makahatag ini sang igo nga kita.

Suno kay Jugador, may madamo nga lokal nga hog raisers ang nagpakig-angot sa iya kag nagpahayag nga indi pa makabawi sa ila mga nalugian kon ₱160 kada kilo lamang ang presyo sang buhi nga baboy.

Dugang pa niya, base sa iya eksperyensya sa pag-alaga sang baboy, mas nagakaigo ang ₱180 kada kilo nga farmgate price agud may makuha nga ganansya kag makabawi sa nagligad nga mga kalugian ang mga manug-alaga sini.