Nagpahayag sang pagkadismaya ang grupo sang mga hog raisers sa Tupi matapos wala makakuha sang klaro nga solusyon kag kasiguruhan sa ila ginapangayo nga pagpagwa sang Executive Order para sa farmgate price sang buhi nga baboy.
Sa interview sang Bombo Radyo Koronadal, ginpahayag ni Arthur Jaurigue, leader sang Hog Raisers Tupi, nga napaslawan sila nga personal nga makapakigdayalogo kay Tupi Mayor Romeo Tamayo, bangud representante lamang sini ang nag-atubang sa ila.
Suno kay Jaurigue, ginpahangop sa ila nga indi mahimo sang lokal nga panguluhan nga magpagwa sang Executive Order nga nagamando sang pagpasaka sang buying price sang buhi nga baboy, bangud posible nga magresulta ini sa legal nga problema.
Dugang pa sini, dismayado sila bangud wala man nakahatag sang konkretong solusyon ukon alternatibo ang mga miyembro sang Sangguniang Bayan para sa ila ginapangabay.
Ginkwestyon man ni Jaurigue ang indi patas nga pagpatuman sang pagsulundan sa industriya, bangud kanya-kanya ang pagtalana sang presyo sang mga meat vendors, nga nagresulta sa pagkipit sang mga local hog raisers.
Sa karon, nagapabilin nga wala sang kasiguruhan ang grupo sa ila ginapangayo nga Executive Order nga nagatuyo nga maproteheran ang presyo sang buhi nga baboy sa banwa sang Tupi.













