Nagapaandam ang Police Regional Anti-Cybercrime Unit 12 sa publiko batuk sa phishing, deepfake kag iban pa nga online scam nga nagagamit sang urgency agud makakuha sang kwarta kag personal nga impormasyon.
Suno kay PMAJ Mark Gerald Norbe, Chief of Police Operations sang Regional Anti-Cybercrime Unit 12, nga nagapakunokuno ang mga scammer nga representante sang Social Security System ukon bangko kag nagapadala sang peke nga links kag websites.
May mga nagagamit man sang AI kag hacked social media accounts sa pagpakunokuno nga kilala sang ila target kag peke nga emergency requests para sa pagpangayo sang kwarta.
Ginapanugyan ni Norbe nga beripikaron anay ang identidad sang kaistorya antes magpadala sang kwarta, kag likawan ang makaduluda nga links, QR codes kag pagpanghatag sang banking information. Kon mabiktima, gilayon nga kontakon ang bangko ukon e-wallet provider kag magreport sa PNP Anti-Cybercrime Group.
Kinahanglan man tipigan ang transaction records kag iban nga ebidensya para sa imbestigasyon kag pagpasaka sang kaso.
Sa ulihi ginapanawagan sang otoridad nga maghunahuna anay antes mag-click ukon magpadala sang kwarta agud malikawan ang online fraud.













