Nagpabutyag sang pagkadismaya ang isa ka hog raiser sa Banwa sang Tupi, South Cotabato, sa sabat ni Mayor Romeo Tamayo sa ila ginpresentar nga signature campaign nga nagapangayo sang P160 kada kilo nga floor price para sa buhi nga baboy.
Sa interview sang Bombo Radyo Koronadal, ginpahayag ni Arthur Jaurigue, leader sang Hog Raisers Tupi nga yara sa idalom sang Titans Hog Raisers Association, nga nadismaya siya sa reaksyon sang alkalde sa ila panawagan.
Suno kay Jaurigue, ginpahayag suno pa ni Tamayo nga wala sila sang mahimo nga tikang sa pagnubo sang presyo sang liveweight bangud ang mando sini nagahalin sa national government.
Dugang pa niya, ginapaabot lamang kuntani sang mga hog raiser nga basahon anay sang alkalde ang ila ginpreparar nga sulat antes maghatag sang sabat sa ila petisyon.
Ginabulubanta man ni Jaurigue nga nagalab-ot sa 700 tubtob 2,000 ka hog raisers ang apektado sang pagnubo sang presyo sang buhi nga baboy.
Kasamtangan nga yara sa P120 tubtob P140 kada kilo ang presyo sang liveweight, bisan pa sang ila padayon nga panawagan nga ipasaka ini sa P160 kada kilo.
Bangud sini, padayon ang panawagan sang mga local hog raisers sa banwa sang Tupi kay Mayor Tamayo nga buligan sila sa ila ginaatubang nga kabudlayan.













