-- ADVERTISEMENT --

Nagpanawagan si Akbayan Party-list Representative Chel Diokno sa Philippine National Police (PNP) nga magpatuman sang maximum tolerance kag indi paglapason ang kinamatarong sang mga pumuluyo sa malinong nga pagtililipon kag kahilwayan sa pagpahayag.

Ini kasunod sang pagdakop sa ginabanta 300 ka mga nagprotesta sa Metro Manila sang Domingo, Nobyembre 15, nga naghiwat sang mga demonstrasyon may kaangtanan sa ginalauman nga pagbisita ni US President Donald Trump para sa ASEAN Summit, lakip na ang “Pax Silica” initiative kag iban pa nga nasyonal nga isyu.

Lakip sa mga nadakpan sa Muntinlupa kag Manila ang mga mangunguma kag mga estudyante.
Suno kay Diokno, bisan importante ang pagmintinar sang katawhay kag kahilwayan, indi ini dapat mangin kabangdanan sa paglapas sang mga kinamatarong nga ginatugyan sang Konstitusyon sa mga Pilipino.

Ginpabutyag man niya nga ang kahilwayan sa pagpahayag sang pagtamod, paghatag sang kritisismo kag pagpanawagan sang pagbag-o importante nga bahin sang demokrasya.

Bangod sini, ginpangabay niya ang kapulisan nga magpakita sang pagpugong kag pagtahod sa pag-atubang sa mga nagaprotesta, kag pasiguruhon nga ginatamod ang ila kinamatarong sa pagpahayag.