-- ADVERTISEMENT --

Nanawagan si Arnel Barroso Jr., president sang Titans Hog Raisers Region 12, kay Tupi Mayor Romeo Tamayo nga magpakita sang political will paagi sa pagpagwa sang Executive Order nga magapatuman sang mas mataas nga floor price sang buhi nga baboy.

Sa interview sang Bombo Radyo Koronadal ginpahayag ni Barroso, nga yara sa awtoridad sang alkalde sa idalom sang Local Government Code ukon RA 7160 ang pagpatuman sang tikang nga makabulig sa mga hog raisers nga padayon nga nagalugi.

Ginpabutyag ni Barroso nga dapat may kaangay man nga programa ang Banwa sang Tupi kasubong nga may yara man sang programa ang Tampakan Community Meat Shop nga nagahatag sang isa ka kilo nga bugas sa kada kilo sang karne nga baklon.

Ginapangabay naman ni Barroso ang mga hog raisers sa Tupi nga hulaton anay ang aksyon sang alkalde sa Miyerkules antes magdesisyon kon igapadayon ang ginaplanuhan nga welga, bangod mas ginapaboran nila nga masolusyonan ini paagi sa dayalogo.

Sa karon, Banwa sang Tampakan, South Cotabato pa lamang ang opisyal nga nakapagwa sang Executive Order, samtang ginarepaso pa ang mga draft kag dokumento sang Columbio, Syudad sang Koronadal, T’boli, Santo Niño, Surallah kag Lake Sebu.

Padayon ang pagpangabay sang grupo sa mga LGU sa Region 12 nga magpatuman sang kaangay nga tikang agud maproteksyunan ang pangabuhian sang mga lokal nga hog raisers.