Nahibaluan mo bala, Ka-Bombo nga isa ka talalupangdon nga operasyon ang natigayon sa Barcelona, Spain, matapos ang donor naghatag sang iya nawong antes nagsaylo sa assisted dying procedure.
Ini ang una nga kaso sa kalibutan nga ang donor nagdonar sang iya facial tissues antes magpatigayon sang medical procedure para sa iya kamatayon.
Suno sa Vall d’Hebron Hospital, halos 100 ka medical experts, lakip ang mga psychiatrist kag immunologist, ang nagbuligay sa komplikado nga operasyon.
Ang recipient nga ginpakilala sa pangalan nga Carme nag-antos sang pagkaguba sang facial tissues bangud sa bacterial infection halin sa kagat sang insekto, nga nakaapekto sa iya paghambal, pagkaon kag panulok.
Ginpahayag sang ospital nga kinahanglan sumpong ang gender, blood type kag kadakuon sang ulo sang donor kag recipient agud mangin posible ang transplant.
Ini na ang ikaanom nga facial transplant nga ginhimo sang Vall d’Hebron Hospital.
Didto man natigayon ang una nga full face transplant sa kalibutan sang 2010.









