-- ADVERTISEMENT --

Nagapakita sang padayon nga pagtubo ang koleksyon sang Bureau of Internal Revenue (BIR) matapos magrekord sang 5.63 porsyento nga pagsaka sa gross revenue collections halin Enero tubtob Oktubre sini nga tuig.

Base sa pahayag sang ahensya, nagdangat sa P2.814 trilyon ang kabug-usan nga nakolekta nga buhis sang Nobyembre 12.

Para sa bulan sang Oktubre lamang, nagsaka man sang 5.92 porsyento ang koleksyon kag naglab-ot sa P348.54 bilyon.

Suno kay BIR Commissioner Charlito Mendoza, ginatarget sang ahensya nga malab-ot ang P3 trilyon nga koleksyon antes matapos ang Nobyembre.

Ginpahayag niya nga padayon nga panikasugan sang BIR nga mapabilin sa sobra lima ka porsyento ang ila pagtubo kada tuig paagi sa mas hugot nga pagmonitor kag pagpatuman sang mga polisiya sa pagbuhin.

Lakip sa ginapalig-on nga tikang sang ahensya amo ang pagmonitor sang mga koleksyon, pagdakop sa mga nagalikaw sa pagbayad sang buhis, pagsumpo sa ilegal nga baligyaan kag pagpaayo sang serbisyo para sa mga taxpayer.

Dugang pa sang BIR, padayon nila nga palig-unon ang pagsunod sang publiko sa obligasyon sa buhis, samtang ginapasimple ang proseso agud mas mahapos para sa mga taxpayer ang pagbayad sang ila mga obligasyon sa gobyerno.