Walo na ang kumpirmado nga patay kag 19 ka iban pa ang pilason kasunod sang pagkarumpag sang tatlo ka panalgan nga residential building sa Flatbush Avenue sa Brooklyn, New York.
Suno sa New York City Fire Department (FDNY), apat sa mga pilason ang yara sa kritikal nga kondisyon kag padayon nga ginabulong sa isa ka balay-bulolngan.
Nagapadayon ang search and rescue operation agud mahibaluan kon may iban pa nga mga pumuluyo nga na-trap sa idalom sang mga narumpag. Lakip sa mga naluwas amo ang isa ka nagabusong nga babaye, nga nasapwan nga buhi sa sulod sang narumpag nga estraktura.
Nagapakita ang una nga impormasyon nga ang isa ka duog diin ginahimo ang pagkutkot nahamtang sa tupad sang tinukod nga estraktura. Gina-imbestigaran sang mga otoridad kon bala may kaangtanan ini sa pagkarumpag.
Nagapadayon ang mga rescue personnel sang ila mga operasyon sa bug-os nga gab-i, apesar sang makatalagam nga kahimtangan sa lugar.
Mahimo man makaupang sa pagpangita ang mabaskog nga ulan, nga ginaupdan sang daguob kag kilat.
Padayon naman ang imbestigasyon agud mahibaluan ang gintunaan sang insidente kag agud mahibaluan kun may iban pa nga mga residente nga nagapabilin nga missing.
