Nagapanawagan si Koronadal City Mayor Erlinda Araquil sa publiko nga magpaabot sang reklamo sa lokal nga panguluhan batok sa mga gasolinahan nga ginatudlo nga wala nagapatuman sang price rollback sa gatong.
Suno kay Araquil, nagporma na ang City Government sang committee nga mag-usisa sa mga reklamo parte sa mga gasolinahan nga nagapabilin nga mataas ang presyo sang gasolina apesar may yara na sang pagpanubo sa presyo sang petrolyo.
Ginpahayag sang alkalde nga kinahanglan mangin patas kag gilayon ang pagpatuman sang price adjustments, bangod indi dapat nga madasig ang pagsaka sang presyo apang malawig antes ipatuman ang rollback.
Gani, gin-agda niya ang publiko nga maghatag sang reklamo kag magpresentar sang ebidensya kon may personal nga eksperyensya sa amo nga sitwasyon, agud maimbestigaran kag mahatagan sang nagakaigo nga aksyon.
Ini kabahin sang panikasog sang lokal nga panguluhan nga mapanalipdan ang publiko batok sa posible nga pagpahimulos sa presyo sang mga produkto nga petrolyo.
