Indi na pagapadayonon sang pamilya ang criminal complaint batok sa police corporal nga nagamaneho sang patrol car nga nakabunggo kag nakapatay sa 8-anyos nga bata sa Syudad sang Koronadal, matapos nga nag-ugyon ang duha ka partido sa settlement agreement.
Sa interview sang Bombo Radyo Koronadal, ginpahayag ni Police Lt. Col. Harold Cornel, hepe sang Koronadal City Police Station, nga ginkabig sang pamilya nga aksidente ang insidente kag nagdesisyon nga indi na magpasaka sang criminal case.
Apang, magapadayon gihapon ang administrative investigation batok sa police corporal, lakip ang unit commander sini nga magaatubang man sang kaso bangod sa command responsibility.
Madumduman nga natabo ang aksidente sang Nobyembre 10, 2026, takna alas 6:40 sang aga sa intersection sang General Santos Drive kag Sinsuat Street, Barangay Zone IV, Koronadal City nga nagresulta sa pagtaliwan sang 8-anyos nga bata nga babae matapos gindala sa balay-bulolngan, samtang pilason naman ang iya lola.
Sa karon, pareho na nga gin-relieve sa ila tagsa ka unit ang duha ka personnel.
Gin-athag man ni Cornel nga ang patrol car nga nadalahig sa aksidente iya sang 1st Sultan Kudarat Provincial Mobile Force Company kag indi sang Koronadal City Police Station ukon South Cotabato Police Provincial Office.
Samtang, ginbisita nanday Cornel, kaupod ang Regional Director kag South Cotabato Police Provincial Director, ang pamilya sang biktima sa funeral home agud magpaabot sang pakig-unong kag maghatag sang pinansyal nga bulig.
Ginpahanumdom naman ni Cornel ang mga pulis kag iban nga motorista nga magmaneho sing mahina-longon kag magsunod sa traffic regulations agud malikawan ang kaangay nga trahedya.
