Gin-athag sang Armed Forces of the Philippines (AFP) nga wala nagatinguha ang Pilipinas nga makig-away sa China ukon sa iban nga pungsod, kundi nagapanindugan lamang ini sa iya kinamatarong kag teritoryo sa tunga sang nagapadayon nga tensyon sa West Philippine Sea.
Ini ang sabat ni AFP Spokesperson for the West Philippine Sea Retired Rear Admiral Roy Vincent Trinidad, kasunod sang pahayag ni Vice President Sara Duterte sa Hong Kong nga dapat likawan sang mga opisyal sang gobyerno ang komprontasyon sa iban nga pungsod, lakip na ang China.
Suno kay Trinidad, ginadepensahan lamang sang Pilipinas ang iya maritime entitlements, sovereignty kag sovereign rights nga ginakabig nga kinamatarong sang pungsod.
Dugang pa niya, ginatuyo sang AFP kag Department of National Defense nga masiguro nga ang masunod nga henerasyon sang mga Pilipino makapanubli sang isa ka bug-os kag hilway nga Pilipinas.
Ginpabug-atan man niya nga wala nagapang-angkon ang Pilipinas sang teritoryo nga indi iya, gani indi ini dapat kabigon nga nagapanguna sa pagpalala sang tensyon.
Nagpanawagan man si Trinidad nga may moral nga obligasyon ang tanan nga Pilipino nga proteheran kag tindugan ang national interest sang pungsod.
