Temprano nga magabiyahe pakadto sa Malaysia ang Gilas Pilipinas sa Nobyembre 21 agud hatagan sang mas madamo nga tion sa preparasyon ang hubon para sa fifth window sang FIBA World Cup Asian Qualifiers.
Ginplano ni head coach Tim Cone nga magpatigayon sang mini-camp sa Seremban City agud makapamilyar ang mga players sa palibot kag sa court sang Karisma Arena, kag mapabakod ang ila chemistry antes ang mga hampang.
Sa Nobyembre 22 naman ginapaabot ang pag-abot sang mga overseas players nga kanday Dwight Ramos, AJ Edu kag Kevin Quiambao, samtang posible man nga makaupod si Kai Sotto.
Ginapaabot man ang pagpartisipar ni Bennie Boatwright, ang bag-o nga naturalized player sang Pilipinas.
Sa karon, may rekord nga apat ka kadalag-an kag apat ka kapierdihan ang Gilas kag yara sa ikalima nga puwesto sa Group E, sa likod sang Australia, New Zealand, Iran kag Jordan.
Una nga atubangon sang Pilipinas ang Syria sa Nobyembre 27, nga sundan sang rematch kontra Iran sa Nobyembre 29, sa ila padayon nga kampanya para makasulod sa FIBA World Cup sa Doha, Qatar sa masunod nga tuig.
