Napaslawan si Alex Eala nga masungkit ang iya ikaduha nga WTA title matapos mapierde sa Amerikanang si Claire Liu sa iskor nga 3-6, 0-6 sa kampeonato sang Hong Kong Open.
Bisan napierde, ginpakita gihapon ni Eala ang iya pagkamatinahuron paagi sa paghatag sang pagdayaw kay Liu matapos masungkit sang Amerikana ang iya una nga tour-level title.
Sa umpisa sang hampang, nag-ilinaway pa ang puntos sang duha ka manug- hampang sa una nga set tubtob nagtabla sa 3-3. Apang, nag-una si Liu matapos magpakita sang malig-on nga pagserbisyo kag pagkontrol sang hampang.
Antes makasulod sa finals, nag-agi anay si Eala sa sunod-sunod nga mabudlay nga hampang, lakip na ang malawig nga semifinals kontra sa anay world number three nga si Maria Sakkari.
Posible man nga nakaapekto sa iya lawas ang sunod-sunod nga hampang.
Sa ikaduha nga set, nagpangayo si Eala sang medical timeout samtang nagapierde sa 0-4 nga puntos kag ginbutangan sang benda ang iya tuo nga paa. May mga tion man nga mabudlay para sa iya ang paghulag, apang ginpadayon gihapon niya ang hampang.
Nagdugay sang sobra 26 minutos ang una nga game sang ikaduha nga set, diin pito ka beses nga nagkaangkon si Eala sang kahigayunan nga makakuha sang lamang kag naluwas ang apat ka break point. Apang, naangkon gihapon ni Liu ang game matapos maglapaw sa pukot ang backhand shot sang Pilipina.
Bisan wala nakakuha sang kampeonato, nagpasalamat si Eala sa iya mga dumuluong nga padayon nga nagasuporta sa iya kag nagpahayag nga daku ang kahulugan sang ila pagsuporta sa iya karera.
