43 ka pilot whale, nasapwan nga patay matapos ma-stranded sa baybayon sang New Zealand

Kapin 40 ka pilot whale ang napatay matapos ma-stranded sa baybayon sang Ngawi, malapit sa Cape Palliser sa North Island sang New Zealand.

Suno sa Department of Conservation (DOC), nasapwan ang 43 ka patay nga balyena sa isa ka kilometro nga bahin sang baybayon halin Ngawi pakadto sa Mangatoetoe.

Antes sini, ginreport sang Project Jonah New Zealand nga kapin 20 ka balyena ang na-stranded, diin apat pa ang buhi kag ginatinguhaan nga maluwas paagi sa pagbulig sang mga ahensya sang gobyerno kag lokal nga katutubo nga Māori.

Suno sa DOC, kinaandan nga nagakatabo ang pag-stranded sang amo nga klase sang balyena, apang wala pa matumod ang matuod nga kabangdanan sini.