Duha sa mga una kuntani nga testigo sang depensa ni Vice President Sara Duterte ang indi makadalo sa pagbukas sang ila presentasyon sang mga ebidensya sa impeachment trial sa Lunes, Nobyembre 9.
Suno kay House lead prosecutor kag Batangas 2nd District Representative Gerville “Jinky Bitrics” Luistro, nagbalibad nga magtestigo si constitutional law professor Ralph Sarmiento agud mapabilin ang iya kahilwayan kag pagkawalay pinilian bilang isa ka legal scholar.
Indi man makatambong si Atty. Suzette Balucanag-Punay, corporate counsel sang GenCorp Industries Inc. kag Metro City Chow Foods Corp., bangud may nakatakda ini nga MRI. Ginapaabot nga iya kuntani ipresentar ang mga dokumento nga may kaangtanan sa mga korporasyon kag negosyo nga ginadugtong kay Duterte.
Bangud sini, tatlo ka iban nga testigo ang ginapaabot nga mag-una sa paghatag sang pamatuod, amo sanday Davao City Assessor Jaime Adalin, Island Garden City of Samal Assessor John Kenneth Enumerables, kag Matina Crossing Barangay Chairperson Cindy Colina.
Ginapaabot nga maghatag ang tatlo ka opisyal sang kasayuran nahanungod sa mga tax declaration kag mapa sang mga duta kag propiedad nga ginakwestyon sang prosecution bangud suno sa ila, wala ini nagatupong sa mga nakabutang sa Statements of Assets, Liabilities and Net Worth ukon SALN ni Duterte.
Antes sini, ginpresentar na sang House prosecution ang mga titulo kag deed of sale sang duha ka propiedad nga suno sa ila wala nagatupong sa mga deklarasyon sa SALN sang Bise Presidente.
