Magabaton sang ila year-end bonus kag lima ka libo ka pesos nga cash gift ang mga kwalipikado nga empleyado sang gobyerno kaupod sang ila una nga sweldo sa bulan sang Nobyembre.
Ini matapos kumpirmahon sang Department of Budget and Management (DBM) nga bug-os na nga ginpagwa ang ₱82.998 billion nga pondo para sa year-end benefits sang mga kwalipikado nga sibilyan, militar kag uniformed personnel.
Sa pahayag sang DBM kahapon nga Sabado, ginpahinumduman sini ang tanan nga ahensya sang gobyerno nga sundon ang natalana nga iskedyul sang paghatag sang mga benepisyo kag indi ini paglangan-on paagi sa separado ukon ulihi nga payroll.
Suno kay Budget Secretary Kim Robert de Leon, gin-apod-apod na sa nagkalain-lain nga ahensya ang pondo kag ila responsibilidad nga masiguro nga mabaton ini sang mga empleyado kaupod sang ila una nga sweldo sa Nobyembre.
Suno pa sa opisyal, daku nga bulig ang amo nga benepisyo sa mga kawani sang gobyerno kag sa ila mga pamilya, ilabi na nga nagahilapit na ang Paskwa.
Suno sa DBM Budget Circular No. 2024-3, katumbas sang isa ka bulan nga basic salary tubtob Oktubre 31, 2026 ang year-end bonus, dugang ang lima ka libo ka pesos nga cash gift.
Sa kabug-usan nga pondo, ₱73.449 billion ang nakalaan para sa year-end bonus, samtang ₱9.549 billion naman ang para sa cash gift.
Agud mangin kwalipikado sa bug-os nga benepisyo, kinahanglan nga nakaserbisyo ang empleyado sang indi magnubo sa apat ka bulan ukon 120 ka adlaw halin Enero 1 tubtob Oktubre 31, 2026, kag yara pa sa serbisyo sang amo nga petsa.
Sakop man sini ang mga regular, contractual kag casual nga empleyado sang nasyonal kag lokal nga panguluhan, lakip ang mga nagkuha sang awtorisado nga leave of absence nga may sweldo.
Ginpahayag man sang DBM nga bug-os na nga ginpagwa sa mga ahensya ang pondo para sa sini nga mga benepisyo sa umpisa pa lamang sang fiscal year 2026.
Apang, nagadepende gihapon sa payroll schedule sang tagsa ka ahensya ang aktuwal nga petsa sang pagbaton, basta masiguro nga mag-upod ang duha ka benepisyo sa una nga sweldo sang Nobyembre.
