Magapabilin sa lima ka tuig ang termino sang mga opisyales sang barangay kag Sangguniang Kabataan (SK) matapos panindugan sang Korte Suprema ang pagkabalido sang Republic Act No. 12326.
Ginbasura sang Korte Suprema ang petisyon ni election lawyer Atty. Romulo Macalintal nga nagakwestyon sa pagpalawig sang termino sang mga opisyales halin apat tubtob lima ka tuig.
Sa desisyon nga ginsulat ni Associate Justice Rodil Zalameda, ginpaathag sang Korte nga ang layi nagabag-o sa kalawigon sang termino sang mga opisyales kag indi lamang nagapaisol sang eleksyon.
Bangud sini, Nobyembre 2028 na pagahiwaton ang masunod nga Barangay kag SK Elections, kag kada lima ka tuig na ini pagahiwaton sa masunod.
Madumduman nga ginpirmahan ni Presidente Ferdinand Marcos Jr. ang RA 12326 sang Setyembre 24, 2026. Ginkwestyon ni Macalintal ang pagpalawig sang termino sang mga nagapungko nga opisyales nga wala anay ginhiwat ang eleksyon, bangud suno sa iya, naapektuhan sini ang kinamatarong sang mga pumuluyo sa pagpili sang ila mga lider.
