Wala ginkakibot sang Federation of Free Farmers sa halos 18 porsyento nga pagnubo sang produksyon sang humay humalin Hulyo tubtub Setyembre bangud sa mataas nga gasto sa pagpanguma kag epekto sang mga kalamidad.
Suno kay Leonardo Montemayor, chairman sang amo nga grupo, madugay na nga nagahimakas ang mga mangunguma sa malahalon nga mga abono, kemikal, pestisidyo kag gatong, magluwas sa kahalitan sang mga bagyo kag baha.
Ginabulubanta ang ani sang humay sang pungsod nga magalab-ot sa 5.8 milyones ka metriko tonelada sini nga tuig, nga mahimo magsobra sa anum ka milyon kon magbaskog ang Super El Niño.
Nagpaandam man si Montemayor nga posible magnubo pa gid ang lokal nga produksyon kag mahimo nga magtaas ang presyo sang bugas subong nga tuig kag sa masunod nga tuig.
Bilang solusyon, iya ginhingyo ang National Irrigation Administration ukon NIA kag lokal nga gobyerno nga padasigon ang pagpatuman sang solar-powered impounding systems agud mapasangkad ang irigasyon kag madugangan ang produksyon sang humay.
