Naga-eksperyensya ang Lake Sebu sa South Cotabato sang pagnubo sang mga turista nga naga-abot bangud sa mga linog nga nag-igo sa Mindanao kag ang wala untat nga pagtaas sang presyo sang nagapanguna nga mga balaklon.
Suno kay Francisco Cerbo Jr., Tourism Operations Officer I, nagpahayag nga ang Lake Sebu nagapabilin nga isa ka nagapanguna nga destinasyon sang mga turista sa probinsya, bangod sang iya manggaranon nga kultura kag nagkalainlain nga mga atraksyon.
Dugang man niya nga ang Dreamweavers Hill may potensyal nga mapauswag pa bilang isa ka destinasyon sang mga turista.
Gindugang ni Cerbo, may yara sang daku nga hulot para sa pag-uswag sang turismo sa Lake Sebu, ilabi na kon ang sitwasyon mag-normal na kag magbalik ang paborable nga mga kondisyon.
Ginpabutyag pa niya nga ang mga sementado nga dalan pakadto sa lugar ang nakabulig sa accessibility sang mga turista.
Apang, magluwas sa epekto sang mga linog, ang sektor sang turismo nagaatubang sang hangkat sang pagtaas sang presyo sang mga balaklon, nga nagdugang sang gasto sa operasyon para sa mga establisimento sang turismo—ilabi na nahanungod sa paghanda sang pagkaon para sa mga bisita.
Apektado man ang adlaw-adlaw nga operasyon sang mas mataas nga balayran sa kuryente kag iban pa nga gasto sa utility.
Gani, ang sektor sang turismo nagalaum sang madasig nga pagbalik sa normal, nga maga-engganyo sa madamo nga mga bisita nga magbalik sa Lake Sebu.
Ginapahayag nga naga-coordinate sila sa Provincial Government agud magpangita sang pamaagi agud mapahagan-hagan ukon makontrol ang nagataas nga presyo sang mga balaklon.
Ang katuyuan amo ang pagbulig sa mga establisimento sang turismo nga huptan ang ila mga serbisyo kag mga ginatanyag nga pagkaon nga barato, nga nagasiguro nga ang mga turista indi apektado sang mataas nga presyo.
