Ginpakamalaot ni Defense Secretary Gilberto Teodoro Jr. ang panawagan ni Chinese Foreign Minister Wang Yi nga maghalong ang Pilipinas sa pagpagwa sang mga pahayag kag paghimo sang mga tikang may kaangtanan sa West Philippine Sea.
Suno kay Teodoro, indi dapat pagdiktahan sang China ang Pilipinas sa pagpaathag sang kamatuoran parte sa nagapadayon nga territorial dispute, kag indi man husto nga akusaran nga nagabinutig ang mga Pilipino.
Ginpatindugan man sang kalihim ang mga ginahimo sang Pilipinas sa pagdepensa sang iya mga katungod sa West Philippine Sea, nga suno sa iya ginasuportahan sang desisyon sang Permanent Court of Arbitration sa 2016 arbitral ruling.
Ang pahayag ni Teodoro amo ang iya reaksyon sa pag-istoryahanay paagi sa telepono nanday Wang Yi kag Foreign Affairs Secretary Ma. Theresa Lazaro.
Sa nasambit nga pag-istoryahanay, ginpanawagan ni Wang nga kilalahon sang Pilipinas ang One China Policy kag mangin mahinalungon sa mga pahayag kag tikang may kaangtanan sa West Philippine Sea.
Nagapabilin naman nga isa sa mga importante nga isyu sa relasyon sang Pilipinas kag China ang nagapadayon nga territorial dispute sa West Philippine Sea.
