Nakabaton sang nagkalain-lain nga livelihood equipment ang 83 Persons Deprived of Liberty (PDLs) sang Koronadal City District Jail paagi sa Department of Labor and Employment (DOLE) Integrated Livelihood Program nga nagabalor sa kabug-usan nga ₱2,444,749.
Lakip sa mga kagamitan nga ginpanagtag ang para sa pagluto, carpentry, welding kag beauty care agud mapauswag ang skills sang mga benepisyaryo kag makahatag oportunidad nga makaumpisa sang kaugalingon nga pangabuhian.
Nag-upod man sa aktibidad si Koronadal City Mayor Erlinda P. Araquil nga nagpahayag sang padayon nga suporta sang lokal nga gobyerno sa mga programa para sa kaayuhan sang mga PDLs, lakip ang pagpatindog sang dugang nga pasilidad sa sulod sang prisohan.
Gina-awhag man sang alkalde ang mga benepisyaryo nga amligan kag gamiton sing husto ang mga kagamitan agud mangin mapuslanon ini sa ila pagpalambo sang pangabuhian kag preparasyon sa mas maayo nga kabuhi sa tion nga makagwa na sila sa prisohan.
