Natumod sang South Cotabato Police Provincial Office ang isa ka person of interest may kaangtanan sa pagpangluthang nga nagresulta sa kamatayon sang isa ka kolektor sa banwa sang Tupi, South Cotabato.
Sa interview sang Bombo Radyo Koronadal ginpahayag ni Police Colonel Isralene Zamora Lauren, acting provincial director sang South Cotabato Police Provincial Office, nga nakit-an sang mga testigo ang duha ka lalaki nga naglabay sa crime scene; apesar, isa pa lang sa ila ang nakilala sang mga imbestigador.
Madumduman nga ginluthang ang biktima sa Purok 7, Barangay Crossing Rubber, Tupi, South Cotabato, pasado alas-11:30 sang aga sang Huwebes, Oktubre 29, 2026.
Ginkilala ang biktima nga si Bernard Verano Malig-on, residente sang Barangay Miasong, Tupi, kag empleyado sang Star Lending Company, Gensan Branch.
Samtang narekober man sa lugar ang mga spent bullet casings nga ginapatihan halin sa .45-caliber nga firearm.
Dugang pa, missing ang motorsiklo sang biktima—puti kag blue nga Honda XRM nga may plaka nga M 2878K. Ginahingyo sang Philippine National Police (PNP) ang publiko nga maghatag sang impormasyon kun makita nila ang motorsiklo.
Nakabaton man ang mga pulis sang una nga impormasyon angut sa direksyon nga gin-agyan sang mga suspek kasunod sang pagpangluthang, apisar nga wala pa makumpirmar ang ila nga destinasyon.
Sa karon, ginausisa sang mga imbestigador ang nagkalainlain nga posible nga mga motibo, lakip ang mga aspeto sang personal nga kabuhi sang biktima kag ang iya trabaho bilang isa ka kolektor.
Sa katapusan ginpahayag sini nga gin-mobilize na ang nagkalain-lain nga PNP units agud mapadasig ang imbestigasyon kag matumod ang responsable sa krimen.
