Ginpaospital ang 53-anyos nga US Senator Chris Murphy matapos siya ma-stroke sang Sabado sang hapon, suno sa opisyal nga pahayag sang iya Chief of Staff nga si Allison Herwitt.
Suno sa report, nabatyagan ni Murphy ang pagpamanhid sang iya isa ka butkon samtang nagatan-aw sang hockey game sang iya anak. Gindala siya sa malapit nga pasilidad medikal antes ginbalhin sa Johns Hopkins Hospital para sa mas maid-id nga pagmonitor sang iya kondisyon.
Sa pahayag sang iya opisina, ginhambal nga malayo sa katalagman ang kahimtangan sang senador bangud malapit siya, alerto kag maayo ang iya sabat sa ginahatag nga treatment. Nagapabilin man nga positibo ang mga doktor nga makarekober siya sing bug-os.
Antes ang insidente, aktibo nga nagakampanya si Murphy sa nagkalain-lain nga bahin sang Estados Unidos bilang suporta sa iya mga kapartido nga Democrat para sa palaabuton nga midterm elections, bisan indi siya mismo kandidato sa sini nga tuig.
Dapat kuntani nga magkadto siya sa New Hampshire sang Domingo agud suportahan ang kampanya sang mga Democrat nga mabawi ang mayorya sa US Senate.
Si Murphy una nga napili bilang senador sang 2013 kag isa sa mga ngalan nga ginakabig nga posible nga magpartisipar sa 2028 Democratic presidential primary election.
Sa karon, nagapadayon ang pagmonitor sang mga doktor sa iya kahimtangan samtang nagalaum ang iya pamilya kag mga supporter sang iya madali kag bug-os nga pag-ayo.
