Nagabenepisyo ang mga Overseas Filipino Worker (OFW) sa Israel sa pagsaka sang baylohanay sang dolyar kontra sa piso bangud mas dako ang balor sang ila mga remittance kon ipadala sa Pilipinas, apang nagapabilin nga mabudlay ang sitwasyon sang ila mga pamilya bangud sa naganubo nga balor sang piso kag pagsaka sang presyo sang mga kinahanglanon.
Sa interview sang Bombo Radyo Koronadal ginpahayag ni Elvie Aviador Pregua, Bombo International News Correspondent sa Israel, nga paborable sa mga OFW ang pagtaas sang dolyar bangud nagadugang ang balor sang ila ginapadala nga kwarta sa Pilipinas.
Apang indi gihapon ini makapahagan-hagan sang kabudlayan nga naeksperyensyahan sang ila pamilya bangud sa nagataas nga presyo sang mga nagapanguna nga kinahanglanon.
Samtang, ginpahayag man niya nga nagapabilin nga normal ang sitwasyon sang ekonomiya sa Israel bisan sa nagapadayon nga tensyon kag gira sa Middle East.
Dugang pa ni Pregua, wala sila nakabatyag sang daku nga pagbag-o sa presyo sang gasolina sa Israel, kabaliskaran sa Pilipinas nga nagaatubang sa pagsaka sang presyo sang gatong.
Sa pihak sini, nagapabilin nga isa ka kabudlayan para sa mga pamilya nga Pilipino ang epekto sang pagnubo sang balor sang piso kag pagsaka sang presyo sang mga produkto, apesar pa nagadugang ang balor sang kwarta nga ginapadala sang ila mga himata nga nagatrabaho sa Israel.
