Patay ang tanan nga siyam ka tawo nga sakay sang isa ka private jet matapos ini mag-crash sa isa ka residential area sa Palm Beach County, Florida, Estados Unidos.
Suno sa Federal Aviation Administration ukon FAA, ang Learjet 60 nga eroplano nagkahulog malapit sa Cresthaven sang Domingo, Nobyembre 1, pasado alas-12:50 sang udto oras sa Estados Unidos.
Naghalin ang eroplano sa Austin-Bergstrom International Airport sa Texas kag padulong kuntani sa North Eleuthera Airport sa Bahamas sang natabo ang aksidente.
Nakuha sa dashcam video ang madasig nga pagbulusok sang eroplano antes ini nagtibusok sa duta kag nagresulta sa mabaskog nga pagsigabong.
Gintawag naman ni US Transportation Secretary Sean Duffy nga makakululud nga trahedya ang natabo.
Nagpadala na ang Federal Aviation Administration sang grupo agud magbulig sa imbestigasyon sang National Transportation Safety Board ukon NTSB.
Wala pa ginapaguwa ang pagkakilala sa mga napatay samtang gin-usisa pa sang mga awtoridad kon may mga residente sa palibot nga napilasan ukon naapektuhan sang insidente.
