Nagalaum nga makabawi sang kapital ang mga seasonal vendors sa Koronadal City Public Cemetery apesar apektado sang pag-ulan ang ila bentahan sa tion sang Todos lo santos 2026.
Sa interview sang Bombo Radyo Koronadal, ginpahayag ni Efren Tugunon, isa ka seasonal vendor sa syudad, naghinay ang ila baligya nga kandila, bulak kag iban pa nga produkto bangud sa pag-ulan nga nagtulod sa temprano nga pagpuli sang mga bisita sa sementeryo.
Dugang pa niya, mas nagdugang ang kompetisyon sa pagpamaligya bangud sa madamo nga vendors nga nagabaligya sa sulod kag palibot sang sementeryo.
Ginpahayag man ni Tugunon nga may posibilidad nga malugi ang mga bulak nga indi mabaligya bangud indi ini madugay, apang mahimo pa nila nga i-stock ang mga wala mabaligya nga kandila kag palupok para sa masunod nga tuig.
Apesar wala pa mabawi ang iya kapital, padayon gihapon siya sa pagpangabudlay kag nagalaum nga magdamo pa ang mamakal sa masunod nga mga adlaw.
Ginpanugyanan man niya ang iya kapareho nga seasonal vendors nga indi magmadulaan sang paglaum kag padayon nga magpangabudlay agud makabawi sa ila puhunan.
