Ginpaidalom ni Ethiopian Prime Minister Abiy Ahmed sa military training ang tanan nga iya mga cabinet ministers kag pila ka senior government officials bilang kabahin sang kampanya nga mapabakod ang ila pisikal, mental kag moral nga kapasidad sa pagserbisyo sa pungsod.
Lakip sa mga nagpartisipar sa nasambit nga pagsasanay sanday Speaker of the House of Federation Muferiat Kamil, Finance Minister Fitsum Assefa kag Health Minister Mekdes Daba.
Suno kay Ahmed, katuyuan sang military training nga mangin physically fit, morally strong kag intellectually capable ang mga opisyal sang gobyerno agud mas mangin preparado sila sa pag-atubang sang nagkalain-lain nga responsibilidad kag mga hangkat sa pagserbisyo.
Nagapati man ang prime minister nga madamo sang importante nga leksyon nga makuha sa military discipline, lakip na ang disiplina sa kaugalingon, patriotismo, pagbinuligay, accountability kag epektibo nga pagpanerbisyo.
Ginpatigayon ang pagsasanay sa tunga sang nagapadayon nga mga problema sa seguridad sa pungsod, lakip ang armadong pag-inaway sa northern Tigray region, kagamo sa Amhara kag nagapadayon nga problema sa seguridad sa Oromia.
Bangud sini, ginakabig nga importante ang pagpalig-on sang disiplina kag kapasidad sang mga opisyal samtang ginahimo sang gobyerno ang nagkalain-lain nga tikang agud maatubang ang mga suliran sa seguridad kag mapabilin ang kalig-unan sa Ethiopia.
