Maga-atubang liwat ang tiglawas sang Pilipinas sa tennis nga si Alex Eala sa American tennis player nga si Alycia Parks sa una nga round sang Hong Kong Tennis Open.
Nakatalana nga magsugod ang nasambit nga torneo sa Lunes, Nobyembre 2, nga mangin isa naman ka importante nga pagtilaw para sa Pinay tennis star sa iya kampanya sa international tennis circuit.
Ikatlo na ini nga kahigayunan nga mag-atubangay sanday Eala kag Parks sa sini nga season.
Sa una nila nga paghampang sa Australian Open, si Parks ang nag-angkon sang kadalag-an matapos malutos si Eala.
Apang wala nagpalutos ang Pinay tennis star bangud nakabawi ini sa ila ikaduha nga pag-atubangay sa National Bank Open sa Toronto, Canada, kun sa diin naangkon ni Eala ang kadalag-an.
Bangud sini, ginahulat sang mga tennis fans ang ila ikatlo nga paghampang agud makita kun sin-o naman sa duha ang magadaug sa ila sunod nga hampang.
Magatinguha si Eala nga ipadayon ang iya maayo nga kampanya kag mag-angkon liwat sang kadalag-an batok sa American player samtang nagapadayon ang iya pagpangabudlay sa internasyonal nga larangan sang tennis.
