Posible nga magsaka pa ang inflation rate sa Pilipinas sa bulan sang Oktubre kag mag-abot sa 7.1 tubtob 8.1 porsyento, suno sa Bangko Sentral ng Pilipinas (BSP).
Suno sa BSP, posible nga magduso sa pagsaka sang presyo sang mga baraklon ang pagmahal sang petrolyo, kuryente kag pamasahe.
Apang mahimo man nga magpahinay sa inflation ang pagnubo sang presyo sang pila ka importante nga produkto sa agrikultura pareho sang utan, karne, bugas kag isda bangud sa bastante nga supply.
Ginpahayag man sang BSP nga padayon nila nga ginabantayan ang mga datos sa ekonomiya, lakip na ang mga nagakatabo sa Middle East kag ang posible nga epekto sini sa presyo sang mga produkto sa Pilipinas.
Sang nagligad nga Setyembre, naglab-ot sa 7.2 porsyento ang inflation rate.
Kun magtupa sa 8.1 porsyento ang bag-o nga projection para sa Oktubre, mahimo ini mangin pinakataas nga lebel sa sulod sang tatlo ka tuig, halin sang naglab-ot sa 8.6 porsyento sang Pebrero 2023.
Samtang, ginalauman nga ipagwa sang Philippine Statistics Authority (PSA) ang opisyal nga datos sang inflation para sa Oktubre sa Nobyembre 5.
