Nagakabaton na sang nagkalainlain nga tawag kag impormasyon ang Philippine National Police (PNP) halin sang ginlunsyar sini ang hotline para mapadali ang pagpangita kay Senator Ronald “Bato” Dela Rosa.
Suno kay PNP Deputy Chief for Administration Lt. Gen. Wilson Joseph Lopez, ginahimo nila ang hugot nga beripikasyon sa tagsa ka impormasyon nga ila nabaton agud masiguro nga masaligan ini kag makabulig sa operasyon.
Padayon man nga ginamonitor sang kapulisan ang mga lugar nga posible nga ginakadtuan ukon ginatambayan sang senador agud mapadali ang iya pagdakop.
Ginkumpirmar man ni Lopez nga nagakoordinar ang PNP sa nagkalainlain nga ahensya sang gobyerno, lakip na ang Armed Forces of the Philippines (AFP), para mapabakod ang operasyon kag mapadasig ang pagpangita sa senador.
Bisan padayon ang manhunt operation, ginapabutyag sang PNP nga mas maayo kon boluntaryo na lamang nga magsungka si Dela Rosa agud malikawan ang posible nga komprontasyon ukon engkuwentro sa tunga sang mga otoridad kag sang senador.
Sa karon, nagapadayon ang pagpangita samtang ginahulat sang kapulisan ang dugang nga impormasyon nga mahimo magtudlo sa iya lokasyon.
