Nagapabilin nga kulang ang mga pasahero sa Koronadal Transport Integrated Complex bisan pa sa nagahilapit nga pagsaulog sang Undas, suno sa isa ka van driver nga nagapamasahi sa terminal.
Sa interview sang Bombo Radyo Koronadal, ginpahayag ni Freddie Bersuela nga wala sila nagapaabot sang pagdagsa sang mga pasahero bangod base sa ila eksperyensya sang nagligad nga tuig, mas madamo pa ang pasahero sa ordinaryo nga mga adlaw sang sa tion sang Undas.
Ginpahayag man niya nga wala sang pagbag-o sa ila iskedyul sang pagbyahe, nga nagaumpisa alas 6:00 sang aga ang first trip kag alas 7:30 sang gab-i ang last trip.
Samtang, ginatudlo ni Bersuela nga isa sa mga rason sang kakulang sang pasahero amo ang mga van nga nagakuha sang pasahero sa kilid sang dalan sa may ProTech, nga posible nagakuha sang mga commuter nga kuntani magsakay sa terminal.
Dugang niya, samtang nagapangabudlay ang mga driver nga yara sa terminal, may iban naman nga van driver nga nagakuha na lamang sang pasahero sa roadside, nga nagadugang sa ila kompetisyon sa pagpangita sang masakyan.
