Ginpahayag ni South Cotabato Sangguniang Panlungsod Board Member Nilda Almencion, Chairperson sang Committee on Agriculture, nga isa sa mga ginatudlo nga rason sa protesta sang mga lokal nga hog raisers amo ang mataas nga importasyon sang karne sang baboy halin sa iban nga pungsod kag ang posible nga indi ensakto nga datos parte sa lokal nga produksyon.
Sa interview sang Bombo Radyo Koronadal, ginpabug-atan ni Almencion nga importante nga ensakto kag masaligan ang datos nga ginahatag sang mga nagamonitor sang produksyon sang baboy sa idalom sang Department of Agriculture (DA), bangud ini ang isa sa mga basihan sa pagdesisyon kon kinahanglan mag-angkat sang karne sang baboy ukon indi.
Suno sa iya, kon nagapakita ang datos nga kulang ang lokal nga suplay, mahimo magdesisyon ang gobyerno nga mag-import sang karne sang baboy. Apang kon nagapakita naman ang datos nga bastante ukon sobra ang lokal nga produksyon, mahimo malikawan ang indi kinahanglanon nga importasyon nga mahimo makaapekto sa pangabuhian sang lokal nga mga hog raisers.
Dugang pa ni Almencion, isa sa mga tikang nga mahimo ipatuman sang lokal nga panguluhan agud mabuligan ang mga hog raisers amo ang paghatag sang training sa paghimo sang ila kaugalingon nga animal feeds. Paagi sini, mahimo nila mapanubo ang gasto sa produksyon kag malikawan ang pagsalig sa mahal nga commercial feeds.
Apang ginpahayag niya nga kinahanglan ang bug-os nga kooperasyon sang mga lokal nga hog raisers kag sang local government unit (LGU) agud mangin madinalag-on ang sini nga programa kag mapalig-on ang lokal nga industriya sang baboy.
