Bukas si Senate Finance Committee Chairman Sen. JV Ejercito sa posibilidad nga imbitahon ang mga civil society organization nga nagabantay sa paggamit sang pondo sang gobyerno sa mga hearing sang bicameral conference committee ukon bicam para sa ginaproponer nga 2027 national budget.
Sa bicam, pagatupungon sang mga senador kag kongresista ang ila tagsa ka bersyon sang national budget antes ini pinal nga aprobahan.
Samtang, nagapanawagan ang People’s Budget Coalition nga usisaon sing maid-id ang kapin P1 trilyon nga mga alokasyon sa gnaproponer nga budget, lakip ang pondo para sa mga proyekto sa imprastraktura, mga programa sang ayuda kag unprogrammed appropriations.
Gina-insister sang grupo ang importansya sang pagpa-access sa publiko sang mga dokumento kag detalye sang mga proyekto agud masubay kun paano gamiton ang kuwarta sang mga nagabayad sang buwis.
Samtang, nagsuporta man si Sen. Panfilo “Ping” Lacson sa panawagan nga hatagan sang tion ang mga civil society organization nga makasubaybay sa mga hearing sang bicam, bangud madamo nga probisyon kag proyekto ang kinahanglan usisaon antes magkasugtanay ang duha ka kapulungan sang Kongreso.
Lakip man sa mga ginapabug-atan sang mga advocacy group ang pondo para sa Philippine Health Insurance Corp. ukon PhilHealth, nga suno sa mga health advocate dapat dugangan ang subsidiya agud masuportahan ang mga benepisyo sang mga miyembro kag mabuligan nga mapanubo ang ila gasto sa pagpatambal.
Madumduman nga nga nagabalor sang P7.2 trilyon ang ginaproponer nga national budget para sa 2027.
