Matigdas nga ginpakamalaot ni Department of National Defense Secretary Gilberto “Gibo” Teodoro Jr. ang pagdayaw ni Senador Robin Padilla kay Chinese Ambassador to the Philippines Jing Quan, sa tunga sang nagadugang nga tensyon sa tunga sang Pilipinas kag China.
Nagtuhaw ang kontrobersiya matapos ginlaragway ni Padilla ang Chinese ambassador bilang edukado, matinahuron, kag direkta nga kaistorya matapos ang ila pagkita sa ASEAN-Chinese Business Leaders Summit.
Suno kay Teodoro, importante nga unahon ang interes sang Pilipinas sa pagpakig-angot sa mga opisyal sang iban nga pungsod, ilabi na sa tunga sang nagapadayon nga indi pag-intiendihanay bahin sa West Philippine Sea.
Sa pihak sini, ginpabutyag ni Padilla nga mas maayo ang personal nga pag-istoryahanay sang mga opisyal agud malikawan ang indi pag-intiendihanay kag mabuligan ang pagpadayon sang kalinong.
Madumduman nga nangin kontrobersyal ang nauna nga pahayag ni Jing bahin sa posibilidad nga maggamit sang puwersa ang China batok sa Pilipinas.
Bangud sini, ginpatawag sang Department of Foreign Affairs ang Chinese ambassador agud ipabutyag ang pagkontra sang gobyerno sang Pilipinas sa iya pahayag.
Sa pihak sang nagkalain-lain nga panan-aw sang mga opisyal, padayon nga nangin importante nga isyu ang pagpanalipod sang interes sang pungsod kag ang pagpangita sang malinong nga paagi sa pag-atubang sang mga problema sa relasyon sang Pilipinas kag China, ilabi na sa West Philippine Sea.
