Nagahingyo sang bulig sa lokal kag provincial nga gobyerno ang hog raiser nga si Manong Panoy bangud sa manubo nga presyo sang buhi nga baboy samtang padayon nga nagamahal ang feeds kag iban pa nga kinahanglanon sa pag-atipan sini.
Sa interview sang Bombo Radyo Koronadal, ginpahayag ni Manong Panoy nga dako ang epekto sang indi balanse nga presyo sang buhi nga baboy kag sang pagkaon sini sa ila pangabuhian.
Suno sa iya, yara na lamang sa P105 tubtob P110 kada kilo ang presyo sang liveweight sang baboy, nga nagapabudlay sa ila nga mabawi ang nagasto sa pagpadako sini.
Gindugang man niya nga indi epektibo nga alternatibo ang pagpakaon sang mga baboy sang utan, bangud mahal man ang mga ini, lakip na ang tangkong.
Bangud sini, nagahingyo si Manong Panoy sa lokal nga gobyerno sang Koronadal kag sa provincial government, partikular kay Governor Reynaldo Tamayo Jr., nga maghimo sang nagakaigo nga mga tikang agud mabuligan ang mga lokal nga hog raiser.
Suno sa iya, ang pag-atipan sang baboy amo ang panguna nga ginakuhaan sang pangabuhi sang madamo nga magbababoy, nga nagasalig sa ila kita para sa pagpaeskwela sang ila mga kabataan kag sa adlaw-adlaw nga kinahanglanon sang ila pamilya.
