Nagapahayag sang suporta ang Masipag Mindanao sa panawagan sang mga lokal nga magbababoy kag mga representante sang lokal nga industriya sang baboy nga untaton ang pag-angkat sang karne sang baboy halin sa iban nga pungsod.
Sa interview sang Bombo Radyo Koronadal, ginpahayag ni Kenneth Cagula, advocacy officer sang Masipag Mindanao, nga nagauyon sila sa ginapatigayon nga protesta sang mga lokal nga hog raisers bangud sa negatibo nga epekto sang pork importation sa lokal nga produksyon kag pangabuhian sang mga magbababoy.
Suno kay Cagula, imbes nga suportahan kag pauswagon sang nasyonal kag lokal nga gobyerno ang lokal nga industriya sang baboy, daw mas ginapili pa sini nga magsalig sa imported nga karne halin sa iban nga pungsod.
Dugang niya, importante nga hatagan sang dugang nga suporta ang mga lokal nga magbababoy agud mapalig-on ang lokal nga produksyon kag maprotektahan ang ila pangabuhian, lakip na ang kaayuhan sang lokal nga sektor sang agrikultura.
